URDAIBAIKO ESENTZIAK

Gaztelugatxeko Doniene Bermeo

Gailurretik biotopo babestu honen ikuspegi paregabeaz gozatuko duzu, gure kostaldeko paisaia naturalik ederrenetako bat osatzen duena.

Hondartza basatiek, labar ikusgarriek, Akatz bezalako haitzek, uharteek, uhartetxoek eta itxura bitxiko flyschak Gaztelugatxeren inguruko agertoki liluragarria osatzen dute.

Ereñozarreko San Migel Ereño

Artadi batek inguratuta, 447 metroko Ereñozar mendiaren tontorrean, non garai batean gaztelu bat eta Erdi Aroko nekropoli bat egon ziren, gaur egun baseliza txiki bat aurkituko dugu.

Talaia natural honetara igotzeko ahalegina itsasadarraren gaineko ikuspegirik onenetako batekin sarituko gaituzte, Gernikatik bokaleraino.

Egun oskarbietan, Durangaldeko mendiak ikusiko dituzu eta, itxaronez gero, iluntzean ikuskizun bat ikusteko aukera ere izango duzu.

Atxarreko San Pedro Ibarrangelu

Akorda auzotik edo Kanalatik igotzea gomendatzen dizugu, familia osoarekin egiteko ibilbide erraz batean.

300 metroko garaieran Euskadiko behatokirik bisitatuenetako bat aurkituko duzu. Izan ere, eskaintzen digun ikuspegia Urdaibaiko Biosferaren Erreserbaren onenetakoa eta osatuenetakoa da.

Hemendik ikusiko ditugu Mundaka, Bermeo, Sukarrieta eta Busturia, Matxitxako lurmuturra, padura, itsasadarrak bokalerantz duen aldaketa, Ogoño lurmuturra, Izaro uhartea… 360º-ko panoramika bikaina eta begietarako opari ederra, hitz batez.

Santa Katalina Mundaka

Mundakatik, ibilaldi atsegin eta labur batean, Santa Katalina ingurura iritsiko gara, aisialdirako gune atsegina.

Baseliza dotoreak edertasun berezia ematen dio lekuari eta, oso toki fotogeniko bihurtzeaz gain, Izaro uhartera zuzenean bideratzen gaituen eta Ogoñoko haitz itzela atzean duen estuarioaren sarrera ikusteko aukera ematen digun behatoki bikaina da.

Bizkaiko Begiratokia Mendata

Urdaibaiko Biosferaren Erreserbaren hegoaldean, Oiz mendiaren hegaletan, Mendatatik gertu, bere izenaren esanahia argi uzten duen begiratoki hau dago. Izan ere, bere aurrean Urdaibaiko arroaren paisaia menditsuaren gaineko ikuspegi zabala ikusiko dugu.

Altamirako San Migel Morga

Euskadiko benetako landa-paisaia ikusi nahi baduzu, hauxe da zure lekua.

Begiratoki on guztiak bezala, naturgune eder batean dago eta dagokion baseliza du.

Hemendik, egun oskarbietan, Ganbeko haran berde eta sakona ikus dezakegu, baserriz beteta. Halaber, kostaldea ikusteko aukera izango dugu, Uribeko eskualdea hain zuzen ere, eta garai batean Batzarretara deitzeko deiadar-mendietako bat ikusiko dugu: Sollube.

Bizkaigane Errigoiti

Errigoitiko Metxikas auzotik gertu eta Santa Krutz baseliza tontorrean duen gailur txiki honek Bizkaiko ikuspegi zoragarria eskaintzen du.

Bizkaigane tontorrera joatea familian egiteko txango erraza da, baita ustekabe ederra ere, bistak benetan politak direlako. Inguruaren aberastasun natural guztia begiesteko aukera emanez gain, bere zabaltasunak Gipuzkoako eta Burgoseko gailur urrunak ikusteko aukera ere ematen digu.

Matxitxako Bermeo

Matxitxako Kantauri itsasoko lurmuturrik irtenena eta gure kostaldearen gaineko behatoki bikaina da. Mendebalderantz, Gaztelugatxe eta Akatz uhartea, ekialderantz Izaro eta Ogoño, eta iparralderantz, Kantauri itsasoa eta zerumuga.

Txoko honetan gelditzeak merezi izango du, ez bakarrik gure kostaldera dituen ikuspegi ederrengatik, baita bere bi itsasargiak, gaur egungoa eta zaharra, bisitatu ditzakezulako ere. Azken horrek Matxitxako lurmuturreko itsas hegaztien eta zetazeoen behatokia du gaur egun.