Mundakako itsasadarraren ertzean dagoen herri honen ingurune ederrak mendi-ibiltaritzarako leku ezin hobea izatea eragiten du, baita hondartzako egun atsegin bat pasatzeko ere.

Udalerri txiki honek inguruko eta Bizkaiko turismoan aitzindari izanaren ohorea du, bere garaian Txatxarramendi uhartean egon zen bainuetxe-hotel handiari esker. Asko merezi du trenez joatea, ibilbide eder batez gozatzen, eta eguna ematea Txatxarramendiko parke botanikoa ezagutzen, itsasontziz paseo bat egiten edo Toña hondartzan eguzkia hartzen.

Bitxikeria bat: Sukarrieta da itsasadarraren bi ertzetan lurrak dituen Urdaibaiko udalerri bakarra. Eskuinaldean, Legendikako (Kanalako) Andra Maria eliza eta hilerri polit bat daude, padurara begira.